【更新回應】
前投資者司榮彬捲入亞視欠薪案，遭勞工處票控44張傳票，裁判官今宣讀裁決，全部罪名成立。(新聞連結： http://bit.ly/2p0heCe )

今次受影響嘅前亞視員工有29人，案情指勞工處發現亞視於2015年12月，至2016年2月期間，未按僱傭條例如期發薪。其實受影響員工不止此數，當中包括亞視前一哥劉錫賢、張家瑩等等。佢哋早前都在被拖欠薪名單中，後來成功追回欠薪。

對於司榮彬今日被裁定罪成，劉錫賢回覆《蘋果》電話訪問時表示：「我有睇到呢單新聞，但我要追嘅攞番晒喇。」問到佢點睇案件判決？劉錫賢就話：「真係兩睇，員工薪金係佢哋應得，公司有責任要畀；但相對司榮彬係比王征（亞視前投資者）有良心，當日佢投資時，買下債權，佢同德勤係找咗條數，否則我哋可能仲要打官司追欠薪。因為其後有員工留底再做多一個月，唔清楚依家指嘅欠薪，到底係前定嗰個月未計好。」

蔡國威回覆傳媒表示：「多謝關心，相信大部份員工上年都拎番晒欠薪，所以舊同事大家都要向前看，我依家喺無綫都有新嘅開始，對於舊公司啲嘢，我都唔再作回應了。」

亞視前財經節目主持章佳強，透過短訊回覆表示：「我認為香港係法治社會，唔應該縱容欠薪事件在香港出現。希望亞視在新投資者支持之下，可以盡快復播，令行業及觀眾得益。」張家瑩亦表示：「我嘅欠薪追番支票喇。其實講真，我喺亞視期間，冇見過司榮彬，見佢出現最多係熄機時，同時爆出欠薪風波，作為員工，被拖欠薪金真係好無奈，希望香港所有公司以後都唔好發生呢啲事。」

為亞視效力留守到底的前公關、「暖男」黃守東，今日也有到法庭支持司榮彬，黃守東今以短訊回覆說：「我的薪金已全取了，感謝關心。全靠司生的努力，與協盛協豐的合作，亞視員工才能拿回欠薪。」而袁潔儀回覆傳媒話：「我的（欠薪）去年已清還！」