2月港股跌市，7日內高低位唔見近4,000點，而近排調整市都唔惹少，5日內跌近2,000點，近兩日跌完697點再升624點，但相比2月，暫時波幅似已減弱，市場情緒相對已經穩定咗。好就好在，貿易戰、兩會等等不明朗因素，大家已有一定心理準備，除非修憲唔通過啫，否則短線爆大鑊劇本出現機會較微。喺咁多潛在負面因素、投資者普遍驚驚青青之下，指數都仲有3萬點，算係咁。

小弟對後市採取審慎樂觀態度，策略上係buy and hold二三線股。跌完700點再彈700點，其實大概打回原形，唔影響本身策略，當然，亦要頂得住指數每日2%波幅。

除咗騰訊（700）之外，散戶焦點股變得走勢難測，例如融創（1918）同恒大（3333）兩隻散戶最愛內房股，近月走勢一般，短期低位徘徊，反而雅居樂（3383）已經重返高位附近。邊隻強弱唔易估，但避開人多擠逼嘅人氣股，冇咁風高浪急。

選股方面，行業基本因素好轉係必要條件，而炒通脹升溫之下，好多板塊業績都處於上升周期，可選擇同炒上嘅股份範圍頗大，於是指數股好難同二三線股同時爆升，即使港股稍後回升，都可能呈輪流炒局面，值得留意。

晉佳

https://www.facebook.com/advanceguy1/