廉政公署經過長時間調查，首度偵破買賣窩輪貪污案，市場擔心窩輪成交會受影響，但嘉賓認為今次事件後，短期雖然有心理壓力，但長遠可能係正面，窩輪發行商喺對冲方面會做得更充足，窩輪價亦可能會更貼正股價格，帶動窩輪市場氣氛轉好。

黃：黃偉康　郭：郭家耀　楊：楊慧玲
楊：窩輪貪污案會唔會影響到窩輪市場？
黃：市場短期會有小小心理壓力，因為會擔心邊間發行商出事，而影響自己買嘅輪，投資窩輪時會小心一啲；不過從正面去睇，窩輪發行商未來對冲會做得足啲，窩輪追蹤正股方面亦會跟得貼啲，可能因此營造一個好氣氛，對窩輪市場有利，長遠可能係正面影響。
郭：始終窩輪市場太多左手交右手情況，但係相信呢次事件之後呢啲情況會收斂，提醒大家炒輪都要睇番窩輪條款，唔好單單睇成交量去炒。
楊：中國移動（941）嘅窩輪好多人都跟黃偉康買，放咗未先？
黃：我仍舊持有（2126）中移動嘅窩輪，我睇佢正股目標價會見125蚊，利潤會唔錯，中移動下跌都只係大戶趁期指結算前挾低，所以𠵱家期指結算完畢，中移動跌到呢啲位應該會有反彈形勢出現。
郭：市場對中移動嘅不安情緒已經喺呢兩日沽貨活動入面反映晒，而我對佢下年盈利都唔擔心，所以110蚊係一個好吸引嘅價位。

甘小姐：我買咗好多中國科技（985），我本來喺好高買，之後一路溝貨，平均入貨價就係0.39蚊，喺0.114蚊個時我又溝咗少少，我覺得溝貨後易啲走嘛。
楊：呢隻股波幅真係好嚇人。
郭：買股票唔同做人道理，唔係喺邊度跌低就要喺邊度企番起身，其實可以選擇啲有基本因素支持嘅股份，而錯咗就一定要止蝕，唔好再溝貨。
黃：佢今次跌咁多又冇晒反彈動力，係因為佢變身失敗，當時佢想收購鉬資源，但係最終協議告吹，而短期又未必會有下一次變身，所以如果佢短期有異動一炒上去就好走。另外，真係唔好再加注喇，買吓其他穩穩陣陣嘅股份好過喇！

-青衣甘小姐個案-
平均買入價：0.39元
目標價：0.39元
止蝕價：-
時期-

林先生：有朋友介紹我買中聯石化（346），佢話去到1.3蚊好超賣，係唔係真係咁抵買？
楊：之前傳出李兆基入股，不過後來已經澄清唔係直接入股，應該炒作會告一段落，呢啲唔當炒嘅股份仲有無機會炒上去呢？
郭：佢波幅好大，好靠傳聞炒上。雖然話高風險高回報，但係如果真係睇好能源股，可能仲有啲穩陣嘅選擇，我自己覺得買中海油（883）會好啲，因為我對佢股價好有信心，就算再跌都係跌少少，相信佢調整亦就快完成。
黃：我好忌名人效應股份，如果消息泡湯，股價就可能一沉不起。如果之前炒上嘅誘因無晒，呢隻股份要小心啲。
林：我聽咗你哋講之後唔入喇，因為擔心風險太大。

-筲箕灣林先生建議-
建議買入價：1.3元
目標價：1.8元
止蝕價：1.1元
時期：三個月

簡先生：我買咗A50中國基金（2823）嘅價外CALL輪（13242）。
楊：內地股市比較波動，令A50中國波動都比較大，唔知買輪有咩嘢要注意？
黃：當A股氣氛因為四川地震而轉弱，持有呢一隻窩輪風險比較高，要留意如果市況突然轉向，揸輪就要識得即時止蝕離場。不過，A50中國正股下跌空間唔係太大，因為6月中央可能推出融資融券，屆時市況會好轉。但A50正股上到20蚊左右可能有阻力，所以喺嗰個位要小心啲。

-屯門簡先生個案-
買入價：0.147元
目標價：0.28元
止蝕價：-
時期：兩個月

王先生：我見中國資源（661）上星期入咗十大升幅，所以買咗，但佢呢幾日跌，點算好？
楊：佢上周升幅不及3月底嗰時升咗六成，而你買嗰日只係升咗兩成幾，又無研究佢嘅基礎，係好多散戶嘅弊端。
郭：佢舊年1蚊開始俾人掟貨，掟到股東不斷減持，我見得太多呢啲股仔話轉型，興礦就買個礦番嚟，有開採證就話自己係礦業股，大家一窩蜂咁炒上去，呢啲股份風險好大，唔值得長線投資。真係買錯咗就最好盡早止蝕。
黃：佢跌咗落嚟，始終會有一下後抽，如果有10%升幅，應該把握機會止蝕，唔好對佢有憧憬。

-葵青王先生個案-
買入價：0.450元
目標價：-
止蝕價：-
時期：一個月

每日收市後4:30pm
歡迎click入 http://finance.appledaily.com
以webcam參與節目及收看

歡迎phonein28698262暢談心得
亦可email至mailto:[email protected]搶先貼股