李克勤於紅館舉行嘅演唱會連日嚟吸引唔少名人同圈中好友捧場，包括有葉劉淑儀、蔡少芬（Ada）夫婦、童愛玲夫婦等。Ada兩公婆仲應克勤要求拖手仔上台當眾錫錫，至於喺台下嘅童愛玲夫婦都順克勤意，即場表演咀嘴，甜蜜滿瀉。

寫冧歌贈老婆

前晚由梁詠琪（GiGi）擔任嘉賓，GiGi仲趁機走埋觀眾席𢭃利是。噚日係情人節，克勤話佢特登作咗首歌叫《天天都是情人節》送畀老婆盧淑儀，問佢仲送咗乜嘢禮物？克勤就話：「乜都畀晒老婆啦！」
初為人父嘅克勤今年開騷真係大豐收，事關每晚都收到fans送畀囝囝李立仁嘅尿片同奶樽，至於利是每晚閒閒都有約二、三百封，克勤話會幫囝囝儲起佢喎！
不過今次演出都有少少阻滯，皆因早幾日克勤俾台上噴出嚟嘅亁冰整到病咗，所以緊接嗰兩晚都係頂硬上演出，克勤話自己唱到腳仔都軟埋，所以𠵱家中西合璧一日飲三劑藥醫病，希望快啲好番。