【蘋果25】王喜遭踢出紅色經濟圈：被封殺唔會死
蘋果日報 2020/06/20 00:00
王喜鄭嘉穎封殺打壓黃安
「港版國安法」殺到，香港經濟前景未明，《蘋果》步入25周年，在亂世中陪伴港人走過高山低谷，為讀者帶來歡樂，娛樂新聞成為城中茶餘飯後的熱話。王喜由於一臉正氣，演過不少奉承守法的紀律部隊角色，戲裏戲外，不平則鳴，在影圈多年見盡娛圈變遷，講起王喜，此人非常「惹火」，改劇本、跟演員鬧不和這些是是非非，令王喜過去25年經常登上《蘋果》娛樂版頭條新聞，總括而言，正面新聞少，負面新聞多。
「唔好講C1，C9都驚啦！」王喜笑說，正因為這些是是非非，曾幾何時絕對是聞「果」色變，「每一次收到你哋電話，『有人話你同鄭嘉穎唔妥喎』、『有人話你獨家村乞人憎喎、打小報告喎！』會問你攞回應，但永遠我講完晒我嗰邊個story之後，第二日出街嗰個版面，發現我所謂嘅回應，只會去到後尾寫個不痛不癢嘅回應，文字比例係200：1，似係我狡辯緊洋洋灑灑1,500字描述嘅一個故事，然後由20字或者50字王喜喺度撐，否認指控，所以個排版係會令受眾覺得呢個人喺個敍事當中幾咁猙獰、幾咁麻煩，咁所以嗰時一聽《蘋果》係驚嘅。」
回想當年記者普遍對自己印象差，王喜深信是自己對「過去」太過保留引發。王喜澄清並非刻意隱瞞入行前曾任警察，只是人在江湖身不由己，王喜續道：「嗰時點解咁多記者對我咁唔客氣，我諗同我最初入行時，我同大家講：『我入行前嘅嘢我唔會講。』引發佢哋好奇，令到佢哋忟憎，衍生落去就係一定有衰嘢。我唔能夠講我當差，就係我離開咗警隊3年之嘛，我驚俾我以前拉過啲人掉返轉知道我而家在明，佢哋在暗去搞我，好似古惠珍『銀雞案』，我點知會唔會班馬嚟TVB伏我？我好驚㗎嘛，再數落去都有驚天動地嘅大案，我走咗出嚟做幕前好危險。」
人生路上往往有苦自己知，王喜慨嘆當年無辦法跟所有記者去講出事實：「因為我連透露畀人知我做過差人都唔敢，所以咪一路產生呢個說不出的秘密囉，所以大家覺得呢個身有屎，令到大家對我印象好差，覺得我有乜咁巴閉？衍生大家筆下嘅我有咁多不滿，覺得我唔合作、扮嘢。」
王喜於2016年在facebook轉發《蘋果》一則有關中國已故總理周恩來可能是同性戀的報道，遭「台獨剋星」黃安舉報，指王喜褻瀆周恩來；白色恐怖隨之而來，王喜為央視拍攝介紹消防官兵工作的節目《了不起的挑戰》播出時，王喜的演出被大幅刪除，更慘被打格仔，自此，王喜不曾在大陸節目再出現，就跟《蘋果》多年來被大陸封殺和打壓一樣，王喜說：「你話打壓又好，點都好，牽涉好多現況，香港藝人喺一個言論比較自由嘅地方所做嘅表達，一旦被大陸一個言論同表達自由度相對差好遠嘅地方嘅人發現時，會點樣攞嚟達到佢哋目的呢？只係轉發啫，但佢哋interpretation（詮釋）係轉發等於同意，轉發等於事實，引發落嚟就係一啲批鬥，覺得呢個人犯咗彌天大罪，傷害國家人民感情，於是好多人馬上同佢劃清界線，多一個唔多，少一個唔少之嘛，引發骨牌效應，出現一個『王喜都係唔好掂啦，唔好用佢啦』，變咗成功踢出紅色經濟圈囉。」
經歷過打格風波，王喜解釋當日不敢就「被消失」回應，因為他跟一間大陸公司簽下工作合約，加上不少人跟他搵食，肩上的包袱沉重，所以一直保持緘默。不過，當日事件，倒讓王喜看清楚一些真面目，「我係收咗7位數字夜場表演，因為收咗錢先，然後做完一場逐場扣，我係成筆數畀返嗰個人，我當佢係朋友，我唔想呢個人有任何損失，所以我將全數退返畀佢，但當佢收到錢之後，微信、微博、電話block咗我，再冇出現。所以你話同大陸人相處，或者做朋友，會唔會有好結果呢？可能有人會有，但我用錢銀同情義一齊去做過嘅測試，我暫時未遇到一個大陸人可以做朋友」。
問王喜覺得「封殺」這些伎倆實際上能否起作用？正如2013年無綫封殺壹傳媒，王喜說：「不如我哋睇闊啲，嚟緊中華人民共和國會俾全球百多個國家封殺，你咪睇吓佢會唔會驚囉？佢都唔擔心呀！由被TVB打壓嘅《蘋果》，到被大陸媒體踢出紅色經濟圈嘅王喜，乃至被全個地球大部份國家所制裁嘅中華人民共和國，最終會有自己空間，有自己生存技巧，可能同之前相比冇咁開心，冇咁愉悅，但會唔會死？我覺得唔會死。」
王喜曾經一聽到《蘋果》找他便驚驚。（攝影：陳俊強）
今日的王喜已是《蘋果》之友。
王喜指現今有不少社交平台讓藝人抗辯，令他對傳媒放下戒心。
王喜笑指早年自己出現《蘋果》娛樂版頭條的多數是負面新聞。
王喜坦言初入娛樂圈時不肯多講入行前工作經歷，令不少傳媒忟憎，對他不滿。
《蘋果》遭TVB封殺6年多，王喜認為彼此有不同的生存空間。
為《頭條新聞》主持《驚方訊息》引起極大迴響，可惜遭受警方投訴而無奈冚檔。（電視截圖）
王喜與鄭嘉穎合作《烈火雄心》系列曾屢傳不和。（電視截圖）
林保怡與王喜合作無數，直至2006年二人主持《江山美人》 而鬧不和。（《刑事情報科》劇照）
當過差的王喜，入行後不時演警察 角色，如1999年曾跟陳慧珊拍《吾係差人》。（劇照）
王喜加入無綫便當男主角，包括1996年《闔府統請》演OK德。（劇照）
王喜因轉發《蘋果》有關周恩來是同性戀報道，他參與的《了不起的挑戰》播出時被「打格仔」。（網上圖片）
王喜是非經常成為頭條新聞。
王喜改劇本及與鄭嘉穎不和新聞，曾是《蘋果》娛樂頭條新聞。