近年唔少企業來港上市，港交所亦成日話要喺呢方面加強競爭力，但處理新上市申請嘅效率就鬼咁慢，噚日港交所搞咗個「討論如何強化香港作為中國國際集資中心」嘅研討會，話題之一，正係討論呢樣嘢。
上市科主管韋思齊話，舊年下半年，上市科處理大細公司嘅上市申請時間已較上半年縮短咗12至26日，大中細size嘅公司，平均處理時速已分別降至54、62同75日，但係，佢即場就俾一位女講者「友善」批評。
女講者話其實問吓啲申請上市嘅公司同搞上市嘅中介人，就知痛苦過程仍然有3至4個月。佢話香港要做國際金融中心、中國國際集資中心，仲有好多哋方要改善！
究竟邊個咁斗膽，居然敢響港交所個地頭，當住港交所一眾高層面前向上市科發炮？原來係上市委員會副主席，兼收購合併委員會副主席、公司法改革常委會成員、富而德律師事務所合夥人高育賢。
華華所以寫齊高小姐嘅title，係想話畀大家知，佢講得出呢番話，係既有江湖地位，亦有親身經歷。高小姐話，一間上市公司由遞交初步上市申請書（A1），到去排隊見上市委員會，往往要三四個月；但size大到好似工商銀行咁，上市科都只係需要兩個月零3日，就可以交畀上市委員會，所以佢覺得上市科應該可以再快手啲。佢仲話，保薦人同申請上市嘅公司交畀上市科嘅資料，好多時高到3呎咁厚，已經有好多人質疑過，上市科同仁係咪睇得晒啲嘢？
再者，簡化招股書經已講咗好耐，依佢睇，一半載列於招股書嘅嘢，根本可以抽出嚟作備查資料，咁本招股書就可以薄一半，年中慳唔少紙，唔使斬咁多樹㖭。

高小姐仲建議，快啲推行將初步招股書上載港交所官方網站，事關人哋美國甚至中國內地都經已咁做，而證監會亦已響05年8月做過晒公開諮詢。其實呢個係德政嚟，因為分析員可以早啲做研究報告，記者又唔使四處撲基本資料同冇咁易寫錯，有興趣投資嘅亦都可以早啲了解吓間公司，唔明點解到𠵱家都實行唔到。
同場嘅韋思齊意見接受，不過證監會執董何賢通就話，上載初步招股書到港交所網站仲要研究一個責任問題。唉，依華華話，好簡單啫，加一句「投資者應以正式招股書資料，作為投資依據」咁咪得囉。港交所、證監會，行快啲啦！
[email protected]