無綫傳訊部宣傳科前副總監曾醒明今日應馬浚偉邀請到商台受訪，曾生話自己服務無綫42年，從公關助理，負責整理文件及剪報，默默努力至部門高層，曾生指多年來經歷不少風風雨雨，最後更被風暴掃出嚟。佢指以往公關部同事只會喺幕後工作，甚少企出嚟，但近年因為未有人肯企出嚟面對傳媒，令佢多咗面對傳媒機會。

馬仔指曾生係佢新一輯節目嘉賓，而今輯主題係訪問演藝界幕後精英，佢指不少新一代公關喺處理活動安排同流程上欠妥善同溝通不足，希望借訪問向曾生請教。

至於資深服裝設計造型師吳寶玲（BoBo姐）今日亦有接受馬浚偉節目訪問，分享咗從83年入行至今趣事。BoBo姐話自己曾經跟不少巨星紅星合作，更大爆鄭少秋最愛照鏡，但亦因為秋官咁注重外型同儀表先至可以成功，因為佢企喺幕前，一定要展示最靚嗰一面。

馬仔指有幸着過BoBo姐設計嘅衫，更指呢個係行內身份象徵，BoBo姐笑指如果未着過佢設計嘅服飾，嗰個人應該好人有限。馬仔當年離開大台返大陸拍劇，連續兩部都由BoBo姐造衫，更透露BoBo姐特別偏心自己，因為就算演和尚都好，衫都特別靚過人，BoBo姐解釋因為馬仔份人認真兼勤力，試過喺片場影咗一張馬仔坐喺木凳刨劇本相片，放上網後即被留言洗版。

更多娛聞，喺晒《娛果》
http://fb.com/appledailyent