身懷六甲嘅陳凱琳（Grace），今日去咗沙田馬場出席活動。Grace話為咗襯番條裙，所以着咗對着5吋幼踭鞋，佢話已經得到老公鄭嘉穎嘅批准，但活動後就要即刻換番回平底鞋。對於嘉穎怕佢突然反口要聖誕禮物，Grace笑住話：「嗰日我哋出街，佢問我想要乜嘢聖誕禮物，我就諗若果佢買畀我，我咪要買畀佢，所以我就提議不如今年互相都唔好送，咁就冇壓力，點知佢諗諗下又覺得我陰佢。」Grace話收過嘉穎最貴重嘅首飾就係婚戒，但就因為驚會唔見，所以唔會成日戴住，而佢又話佢同老公都有諗過買定一件首飾送畀肚入面嘅BB，若果係囡就當成嫁妝，係囝的話就送畀未來媳婦。

同場嘅郭羨妮以低胸裙現身，佢笑言自己識得騎馬，但就唔識買馬，不過本身有抽獎命：「試過第一年參加台慶做司儀，突然抽中架車，我都唔知發生乜事，好似發夢咁，又抽中過大利是。」今年聖誕節，郭羨妮話會留喺香港陪阿囡溫書：「我帶佢去主題公園玩，佢都會呻辛苦，我會督促佢，尤其學校功課都多。」佢話擔心教阿囡嗰陣會傷害彼此嘅母女感情，所以成日提醒自己控制脾氣，若果將來課程再深，唯有畀阿囡去補習，免傷和氣。

精選娛聞，喺晒《娛果》
http://fb.com/appledailyent