【本報訊】原屬九西補選民主派正選的劉小麗，未因遭政府DQ放軟手腳，補選期間試過以長跑等方式為李卓人助選。劉坦言這段期間長期焦慮，罕有地經常發噩夢；又因長時間嗌咪，受訪時仍喉嚨不適，她指未來數月或休息沉澱，冀重新思考及整理人生，但相信未來在民主運動上續有角色，亦一定會就政府DQ其參加九西補選進行選舉呈請，目前正與律師商討。

「民主道路不只議會」

劉小麗在補選結束後一星期後接受《蘋果》訪問，坦言至今對民主派敗選仍感難受，而選前未詳細思考個人去向，相信之後會用數個月時間休息沉澱，重新整理人生：「除咗返去教書，賺返啲生活費外，會唔會喺民間做到一啲有建設性嘅嘢呢？呢條長遠嘅民主道路，邊幾個係重要嘅戰場，我哋可以鞏固呢？」她稱整理思緒後可與圈內友好進行集思會討論，「咁樣比較容易睇到時局（可以）點處理」。

劉小麗深明民主運動從來是長跑，「冇人會覺得民主運動只係兩、三年就搞掂，韓國爭取民主要幾十年，台灣當年都用好多犧牲去做，爭取民主要有堅定嘅意志，今日我哋的確面對好大逆境，但係咪一個死局、我哋係咪要放棄？我覺得拉長啲、拉遠啲去睇，其實睇到嘅嘢會唔同，民主嘅道路唔係只得議會」。當問到未來會否仍在民主運動打拼，劉小麗相信不會從此在香港民主運動無角色，「現時係一個相對灰暗嘅時代，需要更多人投入，民主運動唔應該同參選畫上等號」。
■記者林俊謙