叫人投資股票，最好係買大孖沙做大股東嘅股份，好似講緊阿媽係女人，但見過幾次股市風浪，就幾可肯定，每逢大跌市，唔使阿爺叫，大孖沙多數都會出手買入旗下公司嘅股票，令股價可以稍為穩住陣腳。
好似本月8日恒指跌逾兩千點，當大家望住股票機O嘴嗰陣，恒地（012）主席李兆基（四叔）與世姪新地（016）執董郭基煇就入市撈底，郭基煇買入新地個價，仲要平四叔3蚊㖭。

每股入市價平3元

四叔一路話買地產股好過買樓，佢亦身體力行，不斷增持恒地與新地，8號大跌市當日佢就拎超過9,000萬元買入呢兩隻股，𠵱家呢批貨賬面已有進賬，之後佢仲繼續買。
新地大股東郭炳江位公子郭基煇，唔知係咪收到風，還是得高人指點，同日拎超過7,500萬元大手增持新地。
郭基煇買入新地嘅平均價係114.333元，估計佢喺當日下午大市再急挫時先至出手，相對四叔係用平均價117.368元入貨，四叔應該就係當日早段分批入市。
其他撈底勇士包括鷹君（041）主席羅嘉瑞，佢6月中已經開始增持自己間公司，大跌市當日再斥過千萬元掃貨。

呂志和賬面賺一成

新晉賭王呂志和亦拎過千萬買入旗下嘉華（173），呢批貨至今賬面賺一成，呂志和由本月6日開始，連續5日買貨，而上一次場內增持要數到一年半前，佢似係睇準時機出手。
除咗大孖沙，當耀才（1428）係仔嘅葉茂林，股災當日以1,748萬元買入耀才，明顯係心口掛個勇字，不過又畀佢博到，隻股亦生性，兩星期唔夠，帶挈佢賬面獲利55%。

李華華
mailto:[email protected]