【新增影片】

上回提到，樓市癲升下，唔靠父幹上車最容易就係打銀行工，貪其員工按揭計劃可以借足十成按揭上會，只要過到供款佔入息比率，按揭成數不受限於金管局限制，簡單而言可以唔使俾足首期。

不過，只係事隔兩個月，樓價比起年初又再升多一轉。筆者同一位banker傾開，佢係獅子行出身，做咗幾年又升咗幾次，之前一直想上車，但礙於用staff mortgage 等於同銀行簽賣身契，前途要緊唔敢輕舉妄動。

過了幾年到了適婚年齡，眼見樓價乾升，把心一橫賣身就賣身，終於成功催眠自己，突破轉工無謂、樓價係唔會跌的心理關口，打算用10成按揭上車自用，私己錢再密密儲起，萬一變負資產都有錢還。

前陣子banker去沙田第一城睇了三個盤，問題來了，原來400實呎不夠的兩房單位，開價要570萬。

獅子行雖然可以做十成按揭，但貸款額上限最多只可借月薪120倍，都未去到計下供款佔入息比率有無超標，原來賣身都要講資格，月薪唔夠5皮其實賣身都無咩用。

可能大家會反駁，有份銀行工已經好好，係自己心頭高，怕死唔肯出少少首期，又要揀係沙田，仲要買個兩房咁大的單位。不過筆者始終覺得，單係肯簽30年賣身契已經勇氣可嘉，試想象未來幾十年都要披星戴月係中環返工，宜家只係想係沙田買個唔夠400呎、樓齡30年的單位，或許都未為過？

樓價不斷升仍然有人接貨，或許的確曾有一批揸住鐵飯碗、薪高糧準的專業人士，真係去少幾次日本就可以上車。不過，若然連這班少數的上車希望也破滅，港人的購買力究竟是否真是無盡？

記者：陳洛嘉

蘋果財經，關心你飯碗
http://fb.com/appledailyatm