韓片《我的野蠻女友》導演兼編劇郭在容，執導及編寫嘅新日本電影《遇上世界上另一個你》（Colors of Wind），於下周四在港開畫，郭在容近日來港宣傳，同時接受本報專訪。提到近日韓國演藝圈爆出「#MeToo風暴」，郭在容表示本身都有留意，而且都好支持女受害者現身公開真相，行出嚟抗爭。

郭在容指：「好多有權力嘅人，利用自己嘅權力去性侵女性，我都好贊成#MeToo運動，女性行出嚟抗爭。最理想當然係日後冇人再受害。而呢件事唔止係電影界，社會上好多有權力嘅人，都會做呢啲唔好嘅事。」

不過郭在容認為：「我留意到好多女受害者現時公開事件，但因為事情係好耐以前發生，就算想起訴對方，往往都因為證據不足而好難立案或者跟進。」

同時郭在容認為現時韓國有個現象，就係好多女性唔公開身分、有時又講啲唔講啲，或分好多次去講，因而引起外界好多聯想，猜疑事件嘅真偽，佢都有思考呢種做法，有冇偏離#MeToo嘅本質。

而郭在容自己拍戲都盡量唔用情慾場面去表達愛情，認為跟演員要互相尊重，避免利用權力去做啲不當嘅事。

非常關注#MeToo嘅郭在容，亦有問起香港嘅情況，好奇係因為真係「天下太平」，抑或冇人敢出嚟講呢？

更多韓流，喺晒《娛果》
http://fb.com/appledailyent