【李八方online】容海恩撐「何已完」老屈 林卓廷：你傻㗎？
蘋果日報 2019/12/03 19:17
民主黨民建聯范國威陳克勤涂謹申新民黨林卓廷容海恩
立法會保安事務委員會再度開會，選舉正副主席，搞咗一大輪，又係由民建聯陳克勤做主席。到選舉副主席嗰陣，建制派趕盡殺絕，派新民黨容海恩出嚟同民主黨涂謹申爭，容海恩就話自己參選唔關政治色彩事，仲誇張到話可能佢同陳克勤係「夢幻組合」。
保安事務委員會之前已經開過兩次會選主席，至今日先完成選舉，陳克勤以22票擊敗13票嘅新同盟范國威。輪到選舉副主席，阿涂率先報名，建制派又派出容海恩，打算盡攬正副主席。
民主黨林卓廷見到容海恩出嚟，份外眼紅，因為容海恩支持建制派何君堯提出、譴責阿廷嘅議案，阿廷大鬧議案老屈佢喺7.21參與西環騷亂，但其實佢當日連中、上環都冇去過，單刀直入問容海恩：「你係咪傻㗎？」阿涂就問建制派係咪經過區選教訓都仲係要擸晒所有嘢嚟做？
容海恩唔敢回應阿廷嘅問題，只係強調佢角逐呢個副主席位，係本着服務委員嘅心，並無政治色彩嘅，仲話「係咪夢幻組合要參選咗先知。」八方只係想像到，建制派霸晒正副主席嚟做之後，喺阻撓民主派方面的確幾「夢幻」。最後到會議夠鐘都未投到票，下次再續，但結果已經可以預計。
政制事務委員會今日亦都開會選埋副主席，經民聯劉業強以21票擊敗14票嘅公民黨郭榮鏗。由入馬場可能多過去議會嘅劉業強掌政制事務委員會？建制派霸權下，凡事沒有不可能。
設計圖片