【BrandStory】港企萬達寶 不做「IT狗」：作為研發公司 冒險就是基因
multiable萬達寶ERP
IT本是一門專業，但在港從事IT，少不免曾經被這三個字稱呼過——「IT狗」。面對這三個字，入行20多年、萬達寶Multiable策略業務總監Fred Woo表示，香港根本不乏叻的IT人，但行業要擺脫此負面印象，萬變不離其宗，研發產品才是致勝之道，「要脫離『IT狗』呢個行列，需要做返啲有技術含量嘅工作，如果唔係只係一個冇底薪嘅programmer。」
萬達寶主要經營B2B業務，過往作風一直低調，Fred笑言：「好多人都話聽過我哋個名，但唔知係咩公司。」事實上，公司於香港成立超過30年，可算是港產企業管理軟件開發商老行尊，客戶不乏知名品牌；旗下產品包括企業常用之ERP（Enterprise Resource Planning）系統，主要用以整合企業資源、管理各部門工作流程。如果要簡單形容ERP的功能，「ERP又唔係話一啲好新鮮嘅嘢，都存在咗好多年；例如當你有個客戶提出需求，佢可以記錄低，當有客戶件嘢壞咗要整，最基本你都要知件嘢係咪同我買㗎。」
於80、90年代「high-tech揩嘢，low-tech撈嘢」，曾是不少廠佬的金科玉律，不過時代變，此「金句」早已outdated。Fred表示，公司今日能成為香港碩果僅存的企業管理軟件開發商，正因為公司一直堅持靠自己——不做代理，只賣自家製系統。
他表示，研發自家系統成本極高，以近6至7年計，每年開支達8位數。過去有不少行家為賺快錢走捷徑，放棄研發，改為代理外國系統，「以前好多人質疑我哋，但睇事情要睇得長遠，代理產品始終要睇人面色，當代理的產品本身不思進取，你咪滿足唔到個市場需求。」IT業瞬息萬變，腳步稍慢都會被市場淘汰，「當佢哋想返轉頭行返研發條路，同我哋已有距離。我哋而家就享受緊個成果，配合一個適合嘅定位，其實經營得好輕鬆。」
要有一個清晰市場定位，首要了解目標客戶。Fred表示，過往老一輩的客戶，一般要求系統度身訂做，最好一勞永逸；但隨着企業管理層逐漸年輕化，本身已有一定IT知識，因此對產品的要求，亦與以往大有不同，「個客戶係要睇返你個ERP系統，有幾多嘢可以畀佢自己改。」
此趨勢亦證明公司十多年前扑槌的研發方向是正確，Fred指出，公司早已決定研發一套系統，可令一個沒有IT背景的用家，亦可自行更改系統設定，「世界趨勢係Programmer供應越嚟越緊張，如果仲用舊式嘅方法，『我個產品就係咁㗎喇，唔啱同你改到啱』。咁雖然你係一間IT公司，實際仲係一個人力密集嘅解決方案，其實就唔科學化。」他笑指，現時公司出品的系統，不但用家的零活度大為提高，同時亦大大減低自身成本，「老實講，好多時客戶諗法都有啲奇怪，咁最好都係佢有佢諗……而家我哋啲客戶好開心㗎，今日『向左走』完後悔嘅話，聽日『向右走』都唔使通知我哋。」
客戶管理層年輕化，產品以外，銷售推廣都要變。Fred表示，傳統的B2B銷售、宣傳渠道，離不開電視、戶外廣告，「以前我哋叫『飯腳經濟』，請一大隊銷售團隊，有事冇事上去個客度傾吓偈，夜晚約出嚟食飯，或者禮拜六我哋去粉嶺打golf……呢啲做法個效率好低，銷售成本都係非常恐怖。我哋舊式嘅渠道，係接觸唔到班年輕嘅管理者。」他表示有見及此，公司推出新廣告，希望以更貼地手法，接觸年輕的管理人員，找來廣為流傳的meme圖主角劉江，擺明參照近期網絡紅人Brian Cha拍片，「用一個最近喺網上較有爭議性嘅人（作原形），呢個會係一個冒險嘅嘗試，但係本身我哋作為一間做研發嘅公司，冒險係基因嚟㗎嘛。」
不過，投身IT業多年的他，深明即使有一個好的包裝、宣傳，但致勝之道仍然是產品。被問到曾否考慮上市，他表示過往的確有機構上門接觸，不過，「咁公司行另外一條路，係要好花精力。咁不如將啲精力擺喺你個產品上，咁樣會更合適。」
對於香港IT業的發展，他笑言：「有個講法話，只要公司任何有電嘅都歸電腦部管，呢個係香港獨有嘅文化囉。」他寄語同業，不要放棄研發，才可改變社會的「IT狗」印象。
Produced by: Fruity Nutty Studio
For People of Style & Substance
-----------------------------
-----------------------------
-----------------------------
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於
《蘋果日報》你的優惠 網上獨家發售！