達成（126）業績省鏡，但股價就喺1年低位，PE勁吸引，又要。達成唔計2010年度（3月底止）特殊溢利3.3億銀，集團7月公佈嘅2011年度純利，查實翻過一番到1.6億銀，靚仔到痹。踏入2012年度，達成有嚟自內房預售收入起碼4億銀入賬，加埋另一瓣餐飲及酒店業，喺佳寧娜品牌優勢底下，兼食住內銷條水，亦坐定粒六。達成2012年度純利翻半番到2.4億銀，預期PE由家陣5字頭單位數，進一步降到得番3.5倍，超級抵買。又達成NAV2.8元，家陣折讓高達73%，呢個折讓，仲未計「佳寧娜」品牌嘅潛在價值釋放，但折讓之大，已經流晒口水。吼實達成，一跌到落0.7元入市，博中線翻一番到1.4元，PE未有耐上到雙位數。

資本策略（497）短短三個月，由1年高位0.35元，跌到家陣近1年低位。但睇番資策，集團手頭現金17億銀，銀彈勁多，財政noproblem。資策現價相對NAV0.52元嘅折讓，亦高達60%，有唔錯折讓墊底。集團基本面冇問題，股價就跟個市跌到飛起。呢轉先嚟轉短打，博資策升20%到0.24元，又係未有耐上到NAV水位。
錢雋