馬浚偉嘅舞台劇《偶然．徐志摩》噚晚喺灣仔演藝學院再度公演，獲東華三院贊助慈善首演場，王賢誌、翁嘉穗同朱慧敏等到場支持。

東華三院主席王賢誌同爸爸王忠桐齊齊到場支持，佢話：「馬仔好早就同我傾呢個合作計劃，我哋都夾咗好耐，終於嚟到今晚。其實我哋廿幾年前已經認識，嗰陣時一齊跟戴思聰學唱歌，當時我都仲未正式加入TVB。反而我喺TVB嘅時候合作就少咗，好記得我哋第一次嘅合作係黃霑主持嘅節目《江山如此多fun》，馬仔當時係主持，而我就負責escort啲現場觀眾玩遊戲，世界真係好玄妙。」

王賢誌仲話好想同馬仔合作做舞台劇：「我知佢寫緊好多劇本，如果有機會我都想合作。越變態嘅角色越好，因為我都有陰暗面，成日做好人真係好悶。」

以東華總理身份出席嘅翁嘉穗，就坦言平時唔係睇好多舞台劇：「如果為咗慈善，都可以考慮吓參演，不過都要同老公商量吓，佢應該冇乜所謂，但係我有兩個仔要照顧。」提到兩個仔，翁嘉穗就話大仔8月會去波士頓升讀大學：「暫時又冇唔捨得，我自己都係10幾歲去咗外國讀書，咁樣可以獨立啲。」不過翁嘉穗就笑言都有叫個仔唔好咁快拍拖，但係如果佢有女朋友都希望見下，知道佢識咗咩人。

朱慧敏就多謝王賢誌邀請睇舞台劇，佢話之前佢哋合作做舞台劇好開心，自己都好鍾意睇舞台劇：「我16歲嗰陣，學校派我去香港話劇團學演戲，嗰時潘燦良係我老師。」

精選娛聞，喺晒《娛果》
http://fb.com/appledailyent