孫佳君、林嘉欣、詹瑞文、伍允龍等喺觀塘出席有線電視新節目《為食情報局》活動，詹sir同林嘉欣送拳套畀兩位主持，寓意打抵其他台，孫佳君就透露節目中會講性話題：「講乜食物令人有慾望，唔介意講，依家尺度寬鬆咗，開放。」

伍允龍話鍾意煮嘢食，問鍾嘉欣有冇讚過？佢話對方話ok，食過唔同種類嘅嘢。提到鍾嘉欣揚言想35歲前生仔，伍允龍話：「That'sagoodwish!」問會唔會幫嘉欣達成？佢話：「等神安排。」咁上天對你好唔好？佢話神對佢好，最近有好電影《惡戰》出街。

咁計劃幾時生B？佢話：「結婚後。」咁幾時結婚？佢話：「生仔前，冇設定年紀。」

會唔會配合嘉欣嘅35歲前生仔計劃？佢話：「順其自然。」

嘉欣依家30歲，即係5年內結婚生仔？佢話：「有，你就會知。」

至於嘉欣開口話想同伍允龍睇《惡戰》，伍允龍話有機會就再睇，話嘉欣讚佢打方面好，文戲都有畀意見，咁有冇讚身材好？但允龍話嘉欣知佢辛苦練習，但身材唔係重點。

其實佢咁遊花園法，真係兜到頭都暈埋。