因為勒索法國國家隊隊友華布拿單嘢，賓施馬自從前年11月之後就再冇入過國家隊。呢位皇家馬德里中鋒喺周三接受法國《隊報》訪問中話，佢同新任法國總統馬克龍係老朋友嚟，食過幾次飯，間中會用短訊聯絡。不過，賓施馬同總統認親認戚都冇用，法國教練迪甘斯照樣冇選佢入伍。

賓施馬同《隊報》講：「我識馬克龍，見過面幾次，同佢一齊食過飯。佢係球迷嚟，我哋有傾偈，之後我哋有用短訊保持聯絡。我識佢全因為大家都鍾意里昂，嗰陣佢仲未從政。」識總統咁巴閉，會唔會俾到壓力迪甘斯呢？賓施馬就話：「我唔會期望馬克龍為我做啲乜，因為做決定嘅人係教練。」

法國足總周四公佈嚟緊六月國際賽嘅大軍名單，馬克龍嘅舊朋友賓施馬繼續落選，前鋒有拿卡迪錫、基沙文、基奧特同「新亨利」基利安麥巴比等。其餘主力有洛里斯、哥斯尼、保羅普巴同尼高路簡迪等。法國六月會同瑞典踢世盃外，另外友賽巴拉圭同英格蘭。