周中西班牙6:1大勝阿根廷嘅友賽，皇家馬德里中場艾斯高連中三元，威風八面。而賽後，佢就對傳媒講，話自己踢國家隊有信心好多，因為喺皇馬贏唔到教練施丹嘅歡心同信任，擺到明就係有投訴。到咗今日，施丹出席賽前記者會，記者們就追住施丹嚟問，而施丹就表示自己對艾斯高並無唔公平。

施丹就話佢好開心見到艾斯高對阿根廷打得咁好，「我無對佢唔公平，或者佢喺皇馬打唔到想踢嘅位置，但佢對於球隊係好重要。」施丹亦都提到，球隊有25個人，但每場佢只可以出11個正選，唔可能滿足哂所有人。而最近就有傳艾斯高有可能夏季轉會到英超班霸曼城，施丹就好斬釘截鐵咁話，艾斯高一定會繼續留喺皇馬。

-------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM