今屆區選殺出唔少靚女小花，除咗喺沙田砌低地頭蟲嘅民主黨「李英愛」曾素麗，當然唔少得喺灣仔大坑撼贏新民黨王政芝嘅28歲傘兵楊雪盈。八方聽聞，區內街坊都好鍾意呢位政治新baby，有人仲覺得，佢同女藝人黃翠如好似，同樣好pure好true，又笑得甜。

政治新baby馬不停蹄

雪盈BB當選後，連日忙到氣咳，馬不停蹄接受訪問。單打獨鬥砌低大黨，好多傳媒都想佢分享選戰心得，包括日本NHK電視台，而當日嘅報道主題係：「今次結果，對步向民主化有相當影響—以抗議活動為契機參選的年輕人8人當選」。既然係咁，又點少得雪盈BB呢！
八方問過雪盈BB，佢喺電話講嘢時有氣無力，陰功豬咯，因為啲訪問真係一個接一個。佢自揭自己唔係第一次接受NHK訪問，笑指可能因為同該台記者相熟啩。八方知道，專注文化研究嘅雪盈BB，都識得日文喎，莫非佢全程都係用日文受訪？佢笑笑口話，雖然自己識少少日文，但因為記者都係用英文問佢，所以都係用番英文答囉。事後雪盈BB都有喺個人fb專頁貼上NHK訪問畫面。

李八方
mailto:[email protected]