當年今日

隔牆有耳:參選男女搶住「執死雞」 - 李八方

蘋果日報 2008/06/08 00:00


9月立法會選舉殺到埋身,一眾「疑似候選人」抓緊任何曝光機會。噚日深水埗保安道街市爆出禽流感,盛傳獲中聯辦支持出戰九龍西嘅梁美芬,同心郁郁出選醫學界嘅何栢良搶先蒲頭,爭取上鏡。
記者懶理「老鼠芬」
「老鼠芬」係九龍城區議員,由於想出選九西,所以當政府宣佈街市爆發禽流感後,佢同成班西九新動力成員,隨即直踩保安道街市,喺街市內四處反覆巡視,睇嚟唔似想捉老鼠,不過在場記者忙於採訪殺雞情況,懶理「老鼠芬」嚟街市「執死雞」。
政府殺雞有前科,工作人員係熟手技工,搞到「老鼠芬」冇死雞執,悻悻然正想閃人之際,港大感染及傳染病中心總監何栢良忽然現身。現場消息話,「老鼠芬」見到何教授,好似嚿攝石咁攝埋人身邊,何教授一邊講,佢就一邊點頭。
何教授犯險深入疫區,自言係應好多電子傳媒要求,既然人哋開到口要佢喺現場接受訪問評論疫情,佢唔想託人手踭,咪幫吓手囉,至於係咪參選,佢都係同一句話:「積極考慮」。街市驚爆禽流感,大家咪以為生人勿近,反之人頭湧湧,地頭蟲民協區議員梁有方都蒲頭,唔知田二少今日會唔會行街市湊熱鬧?