當年今日
關於我們

【黎小田病逝】柳影虹聞死訊泣不成聲 盛讚作品越聽越好聽

蘋果日報 2019/12/01 14:13

病逝換到千般恨黎小田天蠶變柳影虹

柳影虹(柳姐)當年為麗的年代主唱不少劇集主題曲和插曲,都是黎小田作品,其中以《天蠶變》插曲《換到千般恨》最受歡迎。《蘋果》記者致電柳姐,她聞得黎小田病逝大感難過,幾度泣不成聲,她邊飲泣邊說:「我哋一早知(病重)㗎喇,不過佢唔想人知.....我哋咪唔敢講囉。佢又唔想人哋探佢,我哋個個都唔敢探佢囉......我叫佢助手問候佢,如果佢鍾意幾時見我哋嘅,我哋就去見佢,一路等幾個月,我心都知道唔係好妥當,家燕姐打過電話畀我,話當唔知好喇,佢唔想畀人知,千祈唔好去探佢,佢唔想人哋去探佢。我問佢有冇仔女,佢話有個仔,不過冇來往嘅,我話真係陰功.....如果佢有乜嘢需要即管開聲啦,要送粥送飯送湯,我隨時都得㗎,我又唔係好忙,我可以隨時送嘢畀佢食。佢(家燕姐)話得㗎啦,我哋會睇住佢,佢助手Clara會睇住佢,Clara好好嘅。我唔識講,好突然,我話佢(黎小田)係突然間定係一早?佢(家燕姐)話突然間...」
柳姐表示曾經見到小田徒弟陸寶,問及小田病情,陸寶表示師父不想見人。柳姐又表示:「佢曾經同阿寶(陸寶)講過做《流行經典50年》好攰,佢話『我休息咗20幾年,呢一鋪做返夠本喇。』可能真係做得太攰、太辛苦囉。所以有時年紀有咁上下都唔好太辛苦。我人生都好化㗎,有啲製作人想邀請我返出嚟拍吓劇,我都話唔好喇,年紀大咗。一個人食幾多着幾多整定,你睇吓高以翔都慘啦,我睇到我都喊,滴下同情之淚,咁後生就走咗,咁搏,又有乜用呢?啲錢又唔帶得入棺材。」
柳姐表示歷年唱了很多黎小田作品,多到自己一時也記不清,又大讚黎小田作品:「講真,煇哥(顧嘉煇)啲歌比較商業味道重啲,小田啲歌係比較高啲,佢喺英國讀書讀好耐,佢啲歌識欣賞嘅人就會鍾意到不得了,佢作啲歌比較難唱,有啲歌可能冇煇哥啲歌咁受歡迎,但如果你聽耐啲,佢啲歌係襟聽啲,係高啲。我唔敢批評煇哥,煇哥梗係好啦,大眾化囉,係人一聽就鍾意,(嗒落有味?)係,會越聽越好聽。佢《大內群英》隻插曲《一夕到天曉》係我唱㗎,隻歌靚到呢,真係冇幾多個人唱到,難唱囉,所以隻歌唔係好紅,但識聽歌嘅人,就會識聽佢啲歌。」
empty
柳影虹聞得黎小田死訊後幾度泣不成聲。(資料圖片)
empty
黎小田去年作品展演唱會,柳影虹也是演出嘉賓之一。
empty
柳影虹讚黎小田歌曲越嗒越有味。