當年今日
關於我們

【出師不利】食宵夜七人車無端被撞 李克勤:道歉都冇一句就走咗!

蘋果日報 2016/10/22 17:03

白色瑪沙拉蒂跑馬地香港蘋果李克勤

一向好少夜蒲嘅李克勤,噚晚11點幾撇低老婆同兩個囝囝,單拖揸住架7人車去咗跑馬地南亭,警覺性好高嘅克勤,一落車就見到有記者喺度,佢好大方咁打過招呼,跟住就入咗去會合啲朋友。
點知當克勤食咗一個鐘左右,有一個揸住架白色瑪沙拉蒂嘅外籍男士,最初係諗住泊架車喺克勤架車後面個位,唔知係咪斜路泊車有難度,再加上個位本身又窄窄地,呢位外籍男士先撞到後面架車,之後駛離時再撞到李克勤架車,不過呢個外籍男士唔係第一時間落車,反而叫車啲朋友落車,之後再揸架車泊去距離。
現場有記者通知克勤,克勤即刻走出睇吓,佢望住嗰個白色瑪沙拉蒂,再問記者係咪呢架車,不過呢個外籍男士當冇事發生一樣,落車入咗去隔離間酒吧,克勤無奈咁行去自己架檢查傷勢,佢口噏噏咁話:「小事、小事!」轉個頭克勤又走咗去睇吓架車,佢苦笑話:「算喇,只係條氣有少少唔順,係咪洋人嚟㗎?我都識洋語喎!」餐廳裡面都有朋友行出嚟了解,佢話最嬲係道歉都冇一句就走咗,之後再入返餐廳。
大約過咗半個鐘左右,克勤拎住個袋走人,佢話:「走喇!走喇!再唔走驚人撞爛我架車!」臨走話今次係有朋友返咗嚟,大家約食飯。