日本偶像廣瀨鈴近年走紅藝能界，憑住《海街女孩日記》勇奪多個影壇頒獎禮嘅最佳新人，令佢更加搶手。
年僅17歲嘅鈴妹新片《花牌情緣》分成上、下兩集於當地上映，今次夥拍野村周平、真劍佑及松岡茉優等拍檔，而趁下集今日開畫，四位主角由中午開始亮相電視節目造勢，下晝仲趕到冇換衫殺入戲院謝票。

雖然《花牌情緣》上集票房未算理想，但今日活動上，片商竟然宣佈將添食再開續集，鈴妹得悉消息即泣不成聲，更在台上踎低喪喊，旁邊嘅拍檔們見狀反應笑不攏嘴，尤其係野村周平同真劍佑仲笑得非常開心，松岡茉優即盡顯姐姐風範，踎低安慰鈴妹。