35歲林子善明年4月迎娶拍拖多年嘅圈外女友董佩欣(Kary)，喺將軍澳一間酒店設宴50圍，下月去馬爾代夫影結婚相，子善話籌備婚宴大概使費100萬，子善笑言要努力工作跑數搵錢(新聞連結： http://bit.ly/2wjOOm3 )。

今年2月初，子善聯同一班好友，帶埋女友Kary去東京旅行，秘密俾女友一個驚喜……求婚，子善為咗是次求婚，特別學習如何挑選鑽石，最後搵朋友為佢訂造一隻1.6卡D色近廿萬嘅鑽石求婚戒指，子善話：「自己唔想粒石太細粒，老婆啲朋友睇到都唔好，最後揀咗粒好睇啲再圍埋石，老闆都話整完出嚟會幾大隻。」

子善又話未婚妻Kary喜歡動畫《阿拉丁》，所以佢特別扮成阿拉丁燈神，秘密喺東京一個摩天輪出現，子善又將求婚戒指收藏於神燈中，子善話：「佢見到我跪低，佢都唔知發生咩事，最後我叫佢嫁俾我，唔知佢聽唔聽到，但係佢就喊到飛起，佢見到隻戒指咁大隻，仲伸咗我兩腳，話做乜買咁大隻，佢當然好滿意。」子善笑言：「之前都有套口風，問下女友結婚同求婚同一隻戒指得唔得呢，佢話冇問題，講到結婚禮金，岳母好好，開咗個數都好合理。」