杜汶澤日前喺facebook開po要請人，今晚話口未完就貼出一名索女晒胸相，留言話：「啱啱請咗人，嚟我公司做見習生，返十二點收十二點，你哋覺得佢個款，似唔似做得嘢呢？」單係睇圖，網民紛紛對索女表示好冧佢，仲話要阿澤爭人，阿澤今日回覆《蘋果》時話：「佢都未返工，我又未同佢簽約，佢分分鐘一晚紅過Celine（小巨肺譚芷昀）。」喂喂喂，未簽約未返工0架！

原來阿澤唔係請私人助手，而係開公司做網媒。

阿澤話留意到巿場興網媒，所以同幾個朋友集資，打算小本經營搞番個網媒。由於極速需要大量人手，於是用fb做招聘，結果電郵排山倒海傳過嚟，有男有女爭住應徵。

阿澤同員工面試，到底係咪睇樣先？佢話：「老老竇竇，我睇佢中間——整個人中間。出嚟社會做嘢，心胸必要廣闊，男男女女，咁樣對事業係好有影響。我自己都係好心胸廣闊嘅人。」阿澤介紹新員工——即係頭先介紹嗰位索女，叫「九妹」：「佢叫我哋咁叫佢，但佢要叫我哋做『老闆』。」

做得網媒，阿澤係打年輕人巿場，所以員工都要朝氣勃勃，佢話：「將來我哋office，我哋老闆都冇房，同員工一齊坐，打成一片，我哋唔會有階級觀念，size就分大細啫，搞創作，千祈唔可以咁，創作人要有嘢刺激靈感，畢竟工時長，要有嘢提神。」

阿澤預告佢個網好多嘢睇，佢話：「我哋仲會晚晚搞live show。」咁佢哋網站會唔會同毛記電視搶飯碗？阿澤話：「大家友好關係，仲會一齊玩crossover，可以搞埋幾台聯播，互惠互利，我有同林日曦傾過，佢都有興趣，唔明電視台點解成日要互相競爭，其實可以百花齊放，大家拎啲長處出嚟。」

相關新聞：
【杜太點睇？】杜汶澤請靚女見習生 IG張張相低胸小背心
http://bit.ly/2ffafPs