拉票都要抖抖氣，何況係生日呢個大日子？喺港島區同新界西分別爭取連任嘅新民黨葉劉淑儀同田北辰，日前約埋該黨新東之星容海恩喺總部聚首，唔係分享選戰心得，而係慶生，皆因葉劉24日生日、二少則係26日，兩位今年66歲，齊齊喺總部同職員切蛋糕，暫忘選舉嘅緊張輕鬆一下。(當然切完蛋糕，各自又要趕下一場拉票咯!)

葉劉喺facebook話呀，新民黨成立之初，外界預言佢同田二少必定「火星撞地球」，甚至三個月內就會分道揚鑣，事實卻係五年過去嘞，佢哋雖然偶有意見相左，但新民黨依然有不俗嘅發展，相信因為大家都有推動香港發展嘅心。至於生日願望，當然係立會選舉有好成績啦，唔知喺新東初登大場嘅容海恩，會唔會幫葉劉達成願望呢？

各區其餘參選名單詳見此網站：
http://hk.apple.nextmedia.com/legco2016/region#info-all