當年今日
關於我們

【名家搶先睇】恐慌撈貨有幾難?(晉佳)

蘋果日報 2017/06/27 20:00

晉佳

投資、投機、賭博,係完全唔同層次嘅求勝方式,投資、投機來得較有把握,賭博得嚟有值博率嘅機會甚少出現。噚日細價股斬倉潮,講到有幾恐怖都好,都係11:45之前嘅嘢,餘下時間,被斬倉細價股其實以倍數反彈。如果閣下賭得贏,小弟心服口服。
單日有細價股跌逾九成去到1仙,喺自動對盤系統已跌無可跌,即市撈底輸錢嘅最大可能性,係停牌、然後除牌Total loss。不過即市波幅大到咁,通常跌到1仙,只要唔停牌都識反彈,就算只彈去1.5仙,5格都贏五成;去到3仙,贏兩倍。
噚日要時來運到畀你Mon到,的確有難度。以低位反彈最強嘅首都創投(2324)為例,股價跌到低位時間極敏感,係11:45,中午收市隨時會停牌,甚至可能提前拉閘,一停就冇仇報,可以話係極危險時段,換轉係下晝14:00出現1仙低位,值博率就較高。其次,首都創投由0.1元樓上跌到1仙,需時只係短短5分鐘,難以有準備咁撈貨,1仙只存在12秒,成交逾50萬元。去到中午開市,確認唔使停牌,股價已彈到3.2仙,收市更加係7.3仙!

噚日細價股十幾廿隻咁洗倉,亦難專注物色機會,與此同時又要mon住手頭上持股避免受累,邊有時間睇咁多!捕捉extraordinary case嘅機遇,確實可遇不可求。
晉佳