韓國天團BIGBANG成員T.O.P將於下月9號正式入伍，會暫別螢幕2年，雖然有段時間唔會見到齊人嘅BIGBANG，粉絲都好唔開心，不過BIGBANG其他4位成員將分開活動，而隊長G-DRAGON(GD)將會打頭陣，有望喺上半年以Solo新碟回歸樂壇！

據《TVREPORT》報道：「近日有音樂界嘅相關人士透露，GD正準備新專輯，具體回歸日期會視乎專輯嘅完成進度，除咗出碟，GD同時籌備Solo演唱會。」報道又指除咗GD，大成亦將會喺日本舉行巡迴演唱會，據悉目前暫定4月15、16於西武巨蛋，4月22、23號就喺大阪京瓷巨蛋舉行。

隨後BIGBANG所屬嘅YG事務所回應，指GD的確準備Solo新碟中，不過準確時間尚未確定，對於大成嘅日巡報道，YG就冇特別回應。