賽期頻密，各馬房為此疲於奔命，分開應付田、谷兩批馬，由於跑馬地賽事，賽程編排守舊，經常只有三至五班馬份兒，直接製造出如今局面，每隔一、兩周，又是同一批熟口熟面馬再跑。

賽事水準低，場地偏差、排檔形勢，將更直接左右每場賽果，更大鑊的是，不知今次C加3欄C加6彎跑道，偏差會否突變？

賽前十個九個估利內叠，點知有可能錯晒！若偏差持續，人人有路可跟，排位抽籤講運，無得怨；最麻煩是一時一樣，若無變，賽前鍾意的馬抽外檔，信心大減，今次博唔博會扭轉呢？只能靠估。

賽前鍾意第五場「有衝勁」，排位後抽12檔，天呀！唔係黑到咁？心目中最強對手「超強快駒」抽一檔，一內一外，真係可以差好遠。睇住「有衝勁」狀態到位，李易達花了不少時間摸底，季初跑兩場田草1400，其實已不差，上次增程跑1600結果第四，拍住當銳「搵銀天皇」同到，更加證明已如箭在弦。

今朝（21日）睇多課，確認季初仍是肥仔嘅「有衝勁」，如今一點肥肉都無晒，直路走過從容、輕身，狀態肯定係季內最好一次，李易達搵得祈普敦接手，也唔似想再試。如今抽12檔，點跑？一定要靠祈普敦，望不會打擊決心，博有誠意之餘，也要望場地偏差唔好太大，否則唔容易贏1檔賺梗的「超強快駒」。