本欄昨推介德昌電機（179）逆市升2.3%，收4.37元，走勢硬淨，成交又配合，後市似大漲小回格局，可逢低吸納。另外，本周一薦買華能新能源（958），靜靜雞已炒上1成，走勢靚到痹，繼續睇2.40元！
IPO市場近日又熱鬧起來，徐工機械及三一重工齊齊招股，又到炒影子股時候。三一國際（631）子憑母貴，自然係首選，短炒一轉應有水位。
集團主要做挖煤機，上半年純利按年增長22%至4.16億元人民幣，每股盈利13分，預測PE25倍，似乎幾貴，但比較同業，國際煤機（1683）都21倍PE，三一國際貴為龍頭，估值略高可以理解。3月日本大地震後，三一重工派咗部62米（臂架長度）泵車去福島救災，名震全球，可見其機械技術領先全球。公司董事長梁穩根更榮登中國首富，實力非同小可。
走勢方面，三一國際由4月高位10.13元回落，8月中於6.12元見底後大幅反彈，昨收7.89元，逆市炒高3.1%，成交大增至6028萬元。10日線已升近50日線7.50元，走勢佳，MACD牛差距擴大，股友可於7.80元水平買，博見8.50元，失守7.50元止蝕。
魏力