當年今日
關於我們

【為做星可以去到幾盡?】冇錢送禮物畀女友被撇 《造星》參賽者保錡變三失青年

蘋果日報 2018/09/10 00:00

ViuTV全民造星保錡三失青年

為咗做明星,可以去到幾盡?
答案係:變成雙失青年,失業同失戀。
講緊嘅係ViuTV《Good Night Show全民造星》參賽者吳保錡。
現年27歲嘅保錡,之前畀人笑佢係少年八兩金而搞到佢「情緒好忐忑同失眠」,佢為咗參加為期幾個月嘅《全民造星》比賽,保錡辭去原來online marketing網頁剪接師正職工作;為咗應付密集嘅訓練、綵排同節目錄影,佢忙到冇時間陪女友,就係咁,喺上個月進行20強淘汰賽前一日,女朋友要同保錡分手,而喺20強淘汰賽當日,保錡出埋局,無緣入10強,加埋今次賽事失敗,其實做咗三失青年。
喺嚟緊《造星》節目中,保錡要同龍志權等A組隊友表演,但綵排期間,保錡多次缺席,原來佢情緒出現問題,監製花姐(黃慧君)知道之後,就約A組學員作心理輔導話:「你哋參加咗幾個月比賽,相信你哋犧牲咗好多,可能冇時間搵錢,可能冇機會陪到女朋友啦!好似我咁,花咗好多時間喺呢個節目,冇時間陪屋企人,或者喺咁多年你哋所謂尋夢,犧牲咗好多側邊嘅人,同佢哋相處嘅時間。」
花姐講講吓,保錡忍唔住喊出嚟。原來保錡因為要應付節目而冇時間陪女朋友,但就得唔到女友體諒。保錡話:「佢可能唔明訓練幾密集式同有幾辛苦,可能佢覺得我陪佢唔係好夠。有夢想嘅人預咗要付出㗎啦!外人係唔會明白你有幾努力,佢只會睇到你嗰一刻能夠做到幾嘢囉......我對唔住o依家一齊緊個女朋友,佢都唔會體諒我,我有幾想做呢件事。」
原來,花姐心理輔導當日未同女友分手嘅保錡,之後冇幾耐已經被拍拖年幾嘅女友飛咗。
《蘋果》噚日打電話問番保錡,佢話:「係呀,決賽20入10嗰時,前一日(上月18日)就分咗手。錄呢個比賽用好多好多時間,大家睇到30分鐘嘅節目,可能係3個月連連不斷練習拍嘢,我都係普通香港人,都要打工嘅,我玩呢個比賽就辭咗份工,夜晚可能要做part time ,afford到啲錢玩呢個比賽。」
冇咗份工又冇咗個女友,有冇好後悔?保錡話:「總要付出嘅,做人有夢想。」值唔值?「都值嘅,畢竟喺你記憶做咗件你唔會後悔嘅事。」但入唔到10強喎?保錡:「我努力咗表演,就算我入咗10強,我知我自己冇可能贏到。我想努力做一件事,想證明吓自己可唔可以做到自己想做嘅嘢。」被女友飛係因為冇時間陪佢?保錡話:「佢16號生日,首先我金錢上afford唔到送啲乜嘢畀佢,我又冇乜時間準備到啲乜嘢surprise畀佢,因為我真係好攰好攰。我哋30入20,只係休息咗一日,就要開始排另外一個舞...可能(女友)有hard feeling,畢竟可能係幾個月累積出嚟。」
保錡話女友生日當日,自己有請假陪佢食飯同去玩,但就冇時間搞驚喜,亦冇錢送禮物:「真係冇晒錢。」會唔會挽救番段感情?保錡話:「慢慢嚟啦,等生活穩定番啲啦。」保錡話目前未搵到正職,都係做吓兼職先,當然佢最大心願,係可以入娛樂圈圓佢明星夢啦。
empty
保錡辭去原來online marketing網頁剪接師正職工作
empty
當日仲未同女友分手。(ViuTV電視截圖)
empty
花姐知保錡情緒有問題,特登約A組學員做心理輔導。(ViuTV電視截圖)
empty
保錡講到同女友感情出問題而爆喊。(ViuTV電視截圖)
empty
保錡話冇時間陪女友,女友亦唔體諒自己。(ViuTV電視截圖)
empty
其他隊友都戥保錡慘。(ViuTV電視截圖)
empty
當日錄影完冇幾耐後,保錡被女友飛咗。(ViuTV電視截圖)
empty
保錡失去工作、女友同賽事失敗,做咗三失青年。
empty
保錡20強出局。(ViuTV電視截圖)