現年35歲嘅前中國跳水皇后郭晶晶，2012年嫁俾霍啟剛，婚後好快為霍家誕下第四代嫡孫霍中曦，開枝散葉。有指晶晶嫁入豪門後，一直以奶奶朱玲玲為目標，打算生3個先收工，所以平時好積極調理身體，去年再度傳出喜訊，懷有第二胎，而且係陀囡囡，剛好湊夠一個「好」字。

據悉晶晶日前已生咗細女，今日有傳媒影到霍啟剛去咗養和醫院接太太同囡囡出院。約下午一時許，戴住口罩嘅啟剛率先步出醫院，到座駕達抵後，晶晶一手攞住載有囡囡嘅BB車，由另一邊門快步上車，產後嘅晶晶剪咗一頭短髮，明顯發福咗，聽見記者講恭喜都未有回應，似乎係擔心囡囡被攝入鏡頭，然後急步上車。

再添孫女嘅霍震霆身喺內地開會，今日接受《蘋果》電話訪問時笑笑口話：「之前已經探咗BB，多謝晒大家關心，BB女都幾大隻，我哋整家人好開心，o依家多咗個孫女，佢哥哥(中曦)好錫佢。」據悉BB女重近8磅，問到BB靚唔靚，似唔似晶晶？霍Sir表示：「差唔多，幾得意，應該Ok，兩個都似，你地搵啟剛同你地傾啦。」而霍啟剛電話暫時飛留言，未回覆。

啟剛剛才喺微博貼出大仔霍中曦錫細妹嘅溫馨相，留言：「我們家庭增添了一名新成員、我們感到非常幸運和感恩！萬分感謝醫院各位醫生、護士們和所有同事對我們寶寶細心照顧、讓寶寶可以順順利利來到這個世界！現在母女都平安、回家休息了！你看哥哥多乖、一點嫉妒都沒有、很疼愛小妹妹！很溫馨