蘇永康、杜德偉、梁漢文、雷頌德、劉倩婷一齊到薄扶林心光盲人學校參加心嘉年華活動，杜德偉同蘇永康分別帶咗囝囝現身，兩位爹哋用嬰兒孭帶孭住囝囝盡顯暖男一面，兩個BB眼仔睩睩十分精靈，由於陽光充沛，蘇永康BB熱到有啲扭計，爸爸立刻要當場彈起身湊B。

蘇康算係今次活動半個發起人，佢屋企正正喺心光對面，加上囝囝經常鍾意望街睇車，不時見到心光學校banner，於是自發打俾學校睇吓有咩幫手，特意拉埋兄弟一齊支持。蘇永康、杜德偉不約而同帶住BB現身，杜德偉話：「本身冇諗住帶BB，驚影響進度，但覺得BB今日狀態好好，天氣好好，佢哋兩位BB又未見過面，我都想BB出嚟見下世面，亦係阿仔第一次參與慈善活動。」

雷頌德就因為太太未能同行，一人唔能夠帶住三位小朋友，所以單獨支持活動。問到佢有冇將湊仔經交換畀朋友？雷頌德：「冇呀，都係捉住佢嚟玩。」蘇永康話帶BB嚟冇擔心會扭計，雷頌德抽水：「BB脾氣好過老竇。」梁漢文話幾兄弟有時間都會約埋行山，蘇永康話：「曾經叫過安仔（許志安）一齊，點知佢話有冇搞錯呀行山？」杜德偉話：「佢淨係識跑沙灘懶浪漫。」蘇永康接住話：「仲要攝住包萬寶路喺褲到。」重提安仔經典畫面。

活動上蘇永康陪住一班小朋友唱出《陪著你走》，稍後亦會為自閉症小朋友義唱，蘇永康指歷史上有好多天才都有自閉症，唔好忽略小朋友嘅潛能。

更多娛聞，喺晒《娛果》
http://fb.com/appledailyent