王喜自己監製執導嘅節目《喜樂無窮.塞班島》,噚晚佢就帶同5個參賽者出發到塞班島喇!
王喜話今次去塞班島七日,11號返港,佢話原本度咗8個遊戲嚟考驗佢哋嘅體力,但最後佢就加到十二個,呢啲遊戲平時係消防員同救生員玩,阿喜話最難嘅遊戲係要游完水,上岸再玩障礙賽,再鬥快跑上沙灘,真係體力嘅大考驗!
講到咁辛苦,問王喜可擔心冇參賽者可以完成?佢話:「就係要佢哋完成唔到!」佢仲話出發前有女仔曾問佢可唔可以喺未埋位前用浴泡遮身,佢就同啲女仔講:「唔得㗎喎,因為合約寫明唔可以,可能有人想反悔囉,因為合約寫明七日只能得一套泳衣。」
啲女參賽者就騷身材,問佢會唔會騷肌?王喜即答:「吓!合約冇寫㗎喎!我係做導演,留番下集全男班先騷啦!」有冇提醒啲女仔做好防走光措施?佢話:「頭先check行李時,見到有兩個女仔嘅行李有帶「砵仔糕」(nudebra),相信佢哋會用砵仔糕做好防走光措施架喇!但係知道工作人員準備嘅泳衣係綁帶嘅,相信都有一定嘅危險性!希望唔使用後備架啦。」
王喜話遊戲都唔設淘汰賽,全部女仔都可以由頭玩到尾,其中一個遊戲需要班女仔肉搏打鬥,以計分制,最高分就得大獎,到時由佢決定自己獨攬定會平均分比其他參賽者。問佢有冇真人騷鏡頭,如走入女仔房影佢哋梳洗等?王喜聽到即兩眼發光答:「好喎!不過都要俾番少少私人空間佢哋,入房拍攝好似唔係咁好,可能會拍啲佢哋食早餐咁囉!」此外,講到好友陳志雲上訴案,王喜話話之後都會繼續陪陳生上庭,笑指呢個係七人攬球賽,已經踏入第七年,希望明年2月21日,有一個好嘅裁決囉!
其中一名參賽者段隆臻(Lexi)笑言:「7日只着一套泳衣都怕嗅㗎,感覺都有啲核突!」至於運動量,佢就話自己平時都有做開運動,好似滑水滑雪,亦會做足防走光措施,唔擔心走光。講到有人帶砵仔糕,佢就唔係好介意:「墊下都要嘅,效果會好啲!」另一參加者羅苑珊(Seacole)自言都驚走光,但會小心啲,笑言要墊會用其他嘢,話會用椰子殼囉!