韓劇《鬼怪》男星李棟旭及韓國女團f(x)成員Krystal今日喺中環出席嘅GIVENCHY品牌活動。

現年36歲嘅李棟旭上周五認戀23歲「國民初戀」秀智，佢噚日襲先抵港，而Krystal則於今日抵港，兩人亦於活動上合體，而事前大會方面已透露兩位韓星都唔設訪問環節，但二人就有喺台上接受主持嘅提問。

Krystal先出場，佢逗留咗7分鐘，其間都有同現場粉絲揮吓手，但個樣就cool爆。佢喺現場就接受主持問題，並以英文作答，問到想挑戰乜嘢角色時，佢就話冇乜計劃，但遇到心儀角色時會即刻答應，自己想拍多啲動作嘅戲，好似動作片咁。Krystal又話自己唔識下廚，所以都想學煮嘢食。對於明年係f(x)出道10周年，佢就話未有計劃，要同公司及其他成員傾下先，又透露之前去咗歐遊。

及後到李棟旭出場，佢只着上西裝示人，內裡就冇着恤衫，不過佢就好密實未有刻意露胸肌。現場有唔少粉絲捧佢場，李棟旭亦有揮手打招呼，同Krystal一樣只喺現場逗留7分鐘。問到佢每次來港都好短暫，是否冇乜時間遊覽，佢話每次都好趕冇時間去，希望將來可以來港度假，至於如有一日假期會做乜嘢時，佢就話：「自己由細到大都睇香港電影長大，所以希望想去返拍攝香港嘅場地遊覽。」提到近日有乜開心事分享時，李棟旭就冇提女友秀智，反而就提及殘奧，叫大家支持，同時又指自己之後要拍攝新劇。

提到之前拍攝《超人回來了》時同大發BB好老友，佢坦言鍾意小朋友，平日亦同姪仔姪女玩得好開心。如果唔使工作時會做啲乜，李棟旭就話主要都係休息，同時又話要粉絲講多謝佢哋耐心等候。臨走時佢就再同粉絲揮手道別。

更多韓流，喺晒《娛果》
http://fb.com/appledailyent