韓國電影圈今年雖然有多部勁作上映，但韓國電影成功破到500萬人次，唔算好多，除咗今年8月上映嘅《與神同行：終極審判》能突破千萬人次外，暫時成功破500萬人次就有《毒戰寒流》、《安市城》及《完美的他人》。

反而外國電影成績就比較亮麗，當中《復仇者聯盟3：無限之戰》（Avengers: Infinity War）成功破千萬人次，《職業特工隊：叛逆之謎》（Mission: Impossible – Fallout）有逾656萬人次、以及《侏羅紀世界：迷失國度》（Jurassic World: Fallen Kingdom）、《蟻俠2：黃蜂女現身》（Ant-Man and the Wasp）及《黑豹》（Black Panther）都破500萬人次。

而到噚日外國電影再有電影突破600萬人次，截至噚日上映33日、改編自傳奇樂隊QUEEN嘅《波希米亞狂想曲：搖滾傳說》喺韓國時間噚日下午5時35分突破600萬人次，電影開畫至今憑住口碑令票房節節上升，即使上映逾一個月，仍然保持喺單日票房頭三甲位置，而《波希米亞狂想曲：搖滾傳說》亦成功打破咗《孤星淚》（Les Misérables）喺2012年保持嘅592萬人次紀錄，刷新韓國電影史上音樂電影最高票房紀錄。

同時截至現時，《波希米亞狂想曲：搖滾傳說》已穩佔韓國今年電影榜上票房嘅第四位，睇佢走勢將有望超越《職業特工隊：叛逆之謎》打入頭三甲。

精選韓流，喺晒《娛果》
http://fb.com/appledailyent