胡諾言今日帶同兩位寶貝女胡芷苓同胡芷悠出動，到中環PMQ元創坊一個特設原生探索坊，同小朋友畫畫，啟發佢哋創作力。今日胡仔太太陳琪喺屋企安胎冇一齊嚟，身兼母職胡仔湊女就手忙腳亂，好彩有母親助陣幫忙，要o氹掂啲小朋友合照都花好多口水。

之後胡仔話：「唔辛苦，好享受，太太休息我就賺奶粉錢，平時啲活動較商業，今次可以同囡囡一齊玩啟發智慧。」胡仔話真正小胡仔十月中就會同大家見面，要擔起頭家養太太同三位小朋友，正諗緊返內地賺多啲，唔想局限香港發展，胡仔話：「出年年中左右同公司約滿，要幫自己安排下，考慮返國內工作，太太好鼓勵我。」內地佳麗萬千，誘惑當前，胡仔話：「唔驚誘惑，我定力夠，自己呢行咁多年，好多靚女都見過啦，自己托賴建立爸爸身份形象。」不過胡仔離巢與否仍未知道，因為會視公司為首選。胡仔笑指現時喺屋企位置排名最後，但仍很感謝太太為佢帶嚟嘅小朋友同美滿家庭。