這晚尾場第八場二班1200米，引人入勝之處有兩方面，包括三匹賽駒爭跑馬地百萬挑戰盃榜首位置，以及今季首駒四捷能否誕生。

結果兩樣嘢一齊應驗，大摩馬房「海翡翠」上仗不敵「巴基之星」屈居亞軍，今仗由雷神初騎一放到底，險勝頸位，既創出谷草三戰全勝，連同國慶日贏田草1200米開齋，亦成為今季首匹四捷馬，單Win及組合獨贏A1分別派20.5及16元。

至於跑馬地百萬挑戰盃方面，原本由「開心駿馬」及「開心有你」同得40分並列榜首，惟本以38分排第四的「鴻圖飛星」，今場在蘇兆輝胯下力拼跑第三，賽後增至42分成功殺上榜首。此駒起碼可以做兩星期冠軍，事關下次谷戰要到本月25日星期三至舉行。

「海翡翠」騎師雷神雖唔夠分反勝郭能做騎師王，但佢全晚埋單仍憑「歐洲之星」、「首映」、「海翡翠」中三元，對支持者算有交代。至於大摩雖身在澳洲黃金海岸買馬，但今晚以「海翡翠」食尾糊，強勢保持新一年例贏未斷纜。

尾場二至四名分別為「翡翠紅星」、「鴻圖飛星」及「一哥」，搭番「海翡翠」呢條雙翡翠連贏派59.5元係全晚最低紀錄，四重彩則派1,964元亦創整晚新低。

當中「翡翠紅星」加六分變36分，進佔百萬挑戰盃龍虎榜第五位，鞍上人蔣嘉琦整晚四度入Q，停賽兩日前冇馬贏。