日本女星酒井法子於90年代紅遍亞洲，雖然經歷吸毒被捕，但係46歲嘅佢仍然有大批中港台fans支持，近年全面復出就先後到中國、香港、澳門等地吸金，月前更到台灣高雄參演「大港開唱」，為台灣歌迷獻唱金曲。

酒井法子入行30周年，佢無論係開騷抑或推出產品都得到大中華粉絲一呼百應，近年單係開dinner騷已賺到笑。日前，酒井由一名女性工作人員陪同乘搭新幹線，原來當日佢係為咗到上越舉行兩場dinner騷，據知酒井近年開親騷都仍有叫座力，呢次門票每張3萬日圓，即約2,100港元，每場約個半鐘時間用餐，酒井都只係花大約半個鐘大開金口，當日兩場約有200粉絲捧場，進帳已達600萬日圓（約42萬港元），扣除場地及其他開支費用等，當日酒井自己已有200萬日圓（約14萬港元）落袋，都算和味。