呢一期，完全係北水自由行做晒主導，主角當然係H股，同埋大名鼎鼎嘅六行三保等巨型中資股。新嘅北水有幾多？應該係天文數字，閒閒哋以萬億元做單位計算，呢啲錢日日湧入嚟，單程路，係咁買，結果會係點？就係升到你唔信。
大折讓H股已撻着晒，係咁衝，其他中資股遲啲就會接力。今日再講新華文軒（811），因為佢除咗有變相嘅AH股概念外，聽聞仲有大行出報告推介，另外又有大行精選咗幾十隻港股（包括中資股），做咗張「港股必買名單」畀內地股民參考，新華文軒榜上有名，而且排位都好前。
新華5月底上市，今日宣佈07年中期業績，唔使預會有驚喜，估計盈利約有1.4億元，但公司上市集資20多億元後，下半年已開展了多項併購接觸，相信好快會達成一兩項協議，明年開始，盈利會大幅上升。

「新華」個名，在內地好「行」，冇人唔識，在上海股市就有一隻新華傳媒，係首批上市的省級新華書店之一，06年9月借殼上市，06年（12月年結）PE63倍，07及08年預測PE係48倍及36.5倍，新華文軒07年及08年相關數字約18倍及15倍，吸引好多。
新華傳媒同新華文軒兩間公司業務大同小異，其實亦有變相的AH股概念，新華傳媒係（A）股新華文軒係（H）股，內地股民買得新華傳媒，自必然對新華文軒更感興趣，何況仲有大行的「必買名單」推介。
新華文軒上市雖只兩個多月，由於生意模式獨特，在港股中「獨一無二」，因此好快已成為基金股，現時5大基金持股已近4成，另外未有申報的，相信持股量亦不菲。新華文軒發行H股4.4億股，相信現時在街外流通的不足30%（睇每日成交只得數百萬股可知），市值約10億元，北水一到，好快吸亁。
新華文軒大跌市見5.50元後已大幅回升，現時正營造底部，短線上望上市後高位8.70元，中線目標12元。