行船跑馬何止三分險，尤其馬匹本身，好多時一旦腳部受傷，就會被人道毀滅連命都冇，冇得話跛吓跛吓過生活。好似中電副主席毛嘉達隻愛駒「飛馳大道」咁，5月25號大圈操練時，突然左前腳折斷，練馬師胡森同獸醫隨即趕到視察，可惜傷勢太重，獸醫唔想佢受苦，就咁一針啪落去，人道毀滅了結。
冇咗隻馬毛嘉達當然傷心，呢位馬主2012年贏過「寶中寶」後，一直冇得拉頭馬，其實佢仲有隻團體馬「名人」，並會喺今期賽事上陣，不過呢隻馬與過去同綵衣、七捷嘅前冠軍一哩賽盟主「水星」就差得遠咯，「名人」已跌到五班18分，陷於淘汰危機，不過慶幸嘅係「名人」近仗都輸唔遠，狀態有回勇迹象，何況佢曾經喺三班贏過，底質高過呢群對手，毛嘉達想撫平喪馬之痛，最佳辦法就係贏番場頭馬，何況「名人」要加多3分達21分，先可繼續保留，鬥志更加毋須懷疑。