現年27歲男星金玟錫憑神劇《太陽的後裔》而人氣急升，隨後演出作品不斷，包括《Doctors》、《被告人》、《今生是第一次》等人氣劇都有其身影。不過今日韓國方面有消息指，金玟錫唔止事業有好成績，感情都有着落。

據韓媒《SBSfunE》報道，金玟錫與同樣27歲嘅新人模特兒兼演員李珠彬(音譯)於今年7月由同事升呢做戀人，目前已拍拖5個月，而且兩人約會時都唔太介意其他人嘅目光，好享受二人世界。報道又指金玟錫上月尾完成《今生是第一次》拍攝後，孖女友甜蜜遊日本福岡，報道更引述金玟錫、李珠彬嘅共同友人稱：「兩人拍拖嘅事大部分人都知，就算金玟錫忙於拍劇，都會抽空同女友約會。」

對此，金玟錫所屬事務所表示：「金玟錫與李珠彬確實相識，但唔係戀人關係，只係普通朋友。兩人今次係各自同朋友去日本，只係偶遇先一齊食飯。」而李珠彬方面亦否認戀情。

更多韓流，喺晒《娛果》
http://fb.com/appledailyent