【棟析先機】卒之跑首本戲！「喜佳龍」補中冇難度（陳華棟）
蘋果日報 2019/12/20 21:20
補中喜佳龍陳華棟棟析先機首本戲
香港依家啲練馬師陣容幾乎無弱者，一般倉口都養到50匹馬，一啲古靈精怪、難出頭嘅馬，普遍都俾練者放棄，但高手練馬師就係唔驚呢啲挑戰，誓要死馬當生馬練！
好似方嘉柏，啱啱禮拜三（18日）贏咗匹能力有限嘅「飛雲騅」，還記得上手練者麥菲文（已離職）替呢匹馬贏直路1000米，但響方仔麾下就集中火力跑谷草，短途唔掂就增程跑一哩，上場居中跑包尾，今次就採取領放戰術爆大冷。
見到方仔扭盡六壬去搵呢匹馬嘅最佳出路，終於試到場頭馬返嚟！
事實除咗「飛雲騅」，今季仲有「如真如假」，連同上季「精彩飛動」都係難贏而俾佢到破悶局，咁就睇得出方嘉柏確係有料到。
明日（21日）第五場四班1200米，「行星夢」上場阿棟已大力推介，贏馬加六分唔算多，原班角逐肯定有着數。
事實呢類1,300磅超級大馬，跑過一場肯定更有進步，對手無多排檔又靚，可再下一城。
第八場三班1000米，「小太陽」初出輸少少畀「韋小寶」，再戰已可大勝對手，反映實力相當。
如今升上第三班再戰「韋小寶」，受讓磅而本身進步確係顯著，一雪前恥兼取連捷可做到。
第十場三班1400米，「喜佳龍」上仗跑1600米，全程不上不落無心戀戰，阿棟就當佢試閘，小休後今場重返最耍家嘅1400米，形勢截然不同。
個人始終認為此駒可以升上第二班，今戰對手似是而非，補中冇難度。