辰衝執笠，我相當心涼，該店出名門高狗大白鴿眼。滙控（005）呢？我並冇特別唔鍾意，但如果辰衝係文化界陸羽（本人去陸羽倒冇不快），滙控就係銀行界檀島。前景坎坷，食老本，全無改善，稍為有尊嚴嘅人都避之則吉。說話係難聽，但三唔識七我冇必要針對小股東，記住苦口良藥。

咩年代呀？個世界要進步的。但辰衝執笠後，照舊係訪問吓啲阿叔當年點溝名校學生妹，照舊講咩一個年代終結。今次滙控業績後，朋友依然係傳某人在電視落淚張相。傳媒循例又訪問下啲長情股東，「我退休靠晒佢㗎啦，但都冇計，惟有希望下年派返息啦。」

滙控創新低嘅同時，蘋果創緊新高。OK，美股巴閉嘛，唔好咁屈機。但「港版納指」一樣創新高。話港股廢嘅，至少騰訊（700）、阿里巴巴（9988）、美團（3690）等，近年差不多任何位買你都贏錢，而我唔係叫你去買細價股喎。

滙控愚人節彈弓手，除咗淨嘅股息都唔派，至今4個月。有本書叫《Who Moved My Cheese？》。你不停咁鬧滙控令你嚿乳酪冇咗，有冇用？冤有頭債有主，而家係英倫銀行搶咗你嚿乳酪喎。

最好笑係，滙控在歐洲蝕到七彩，南北美非洲中東基本上打和，就係亞洲賺埋貼歐洲蝕！而仲要係英倫銀行禁派息！但公司或股東堅持攬住英國做總部，就唔知點解了，莫非英國有乜乜咁巴閉？而家環境，講遷冊香港梗係政治不正確。但，不如諗吓新加坡之類？阿爺可能肯接受，又可能唔使俾人限派息。

滙控鬧劇，畀大家最大嘅教訓係：投資應該分散。每次我講呢句，都會畀人鬧，但事實如此。唔好講「一早買騰訊、蘋果就冇事」之類。實際啲，買滙控嘅係咩人？多數咩心態？我歷年都接觸唔少呢啲小股東，佢哋並唔係貪心嘅人。可惜，好人未必係有好報嘅。唔係你嘅錯，係社會嘅錯。你問個小股東點解買滙控，想像吓佢會點答？佢應該唔會答「我覺得公司可以改變世界升幾百倍」、「覺得管理層好有型」、「覺得銀行超好賺」。

十個有九個答你「我諗住穩穩陣陣收吓息」。不幸地，呢個世界上，係冇「穩穩陣陣6厘息」，甚至冇「穩穩陣陣2厘息」。美國10年債券，而家係0.6厘息左右。任何超過呢個水平嘅息，就即係「有風險」。只不過，有時風險喺你知嘅地方，有時喺你唔知嘅地方。畀得6厘息你，當然係有相當大風險，你食咗唔知啫。

唔想咁樣，可以點樣？風險其實好難避免。除非你甘心拎0.6%回報，否則必定有風險。但，你可以將佢管理得好啲。我見訪問好多退休人士，居然係可以成副身家放晒落滙控。有啲真係話平日開支就靠收4次息。唔覺得咁有問題？佢有事你咪PK？

我無法估下一隻蘋果，因為話唔埋會變下一隻8號仔，況且退休人士唔適合咁進取。但市面大把收息工具，當然，都係必定有風險。但最重要嘅，就係分散。當你最初買啲滙控，但又買啲恒生（11），買啲中電（2），三間咁啱一齊出業績：一間唔派息，一間減，一間維持。咁你最多係由食半島變成食檀島，但總好過乜都冇！你話，咁咪拖低個股息回報囉？係呀！咁，你想食得好定瞓得好吖？拎個中庸之道囉。我幾肯定滙控嘅股東，而家寧願最初有買其他幾隻。

狡兔都有三窟，出嚟行要幾張鬼卡。退休點可以只靠一隻股票？活在回憶中，到老一場空呀，切記。

李聲揚
財經分析員
facebook.com/ivanliresearch