因為土地問題，搞到香港生育率奇低，連盈盈兩度懷孕都生唔出BB。但有志者事竟成，今年七月一隻剛出世嘅赤麂B女被父母遺棄喺嘉道理農場，一度身體虛弱且脫水。好在經過嘉道理拯救隊連月來悉心照顧，小赤麂終於渡過危險期。

B女家陣已經可以進食固體食物，好似樹葉、紅蘿蔔、南瓜同蕃薯咁。佢嘅體重亦由當初嘅1.6公斤增加到宜家7.4公斤，由手抱BB長大成可愛小孩子，拯救隊員仲幫佢改咗個名叫DiDi。按慣例，嘉道理通常會盡量將拯救返來嘅野生動物放回野外，但由於DiDi太過友善嬌嗲，嘉道理認為佢唔適合放回野外，決定繼續收留佢喺農場，大家有興趣可以去農場探下佢。