今日就係香港小姐競選喇，話晒以前選港姐都係一件盛事丫（好似係），所以「蘋果動搞作」早前就做咗個微型民調，睇下歷屆咁多位港姐，大家覺得邊位係最靚！

趙小姐：李嘉欣丫，恭喜佢呀！

王小姐：有冇得揀呀？麥明詩囉，相比起其他，其實佢幾靚嘅。

黃先生：歷屆最靚嘅港姐呀？朱玲玲丫，因為佢有氣質同埋雍容華貴。我覺得樣固然係緊要，因為唔係靚女理論上就做唔到港姐，但如果靚女係一個入場門卷嘅話，咁我會相對上著重入咗圍佳麗嘅氣質。

郭先生：唔識喎真係，我唔睇港姐好耐，冇睇TVB好耐。

何小姐：最有印象陳凱琳囉，鞋抽嘛！真係最靚呀‥‥‥李嘉欣啦，我覺得佢到o依家都係好靚。

林小姐：我唔睇港姐嗰啲，記憶中都係好耐以前嗰啲。袁詠儀丫，雖然唔知佢真正性格係點，但睇佢啲訪問、演出咁，性格都好似幾好。

潘小姐：蔡思貝係咪港姐呀？最靚‥‥‥佘詩曼吖

鄧小姐：邱淑貞！覺得佢真係好靚！

龍先生：鍾楚紅幾靚，個樣幾成熟。

林先生：其實冇乜點留意嗰個叫做港姐。

婆婆：我對呢啲冇乜興趣，答唔到你。