當年今日

股神小故事:聽老竇話唔掂科網股

蘋果日報 2008/10/06 00:00


畢菲特踏上股神之路,途中遇過唔少風風雨雨。要數佢老人家最難忘嘅經歷,相信唔少得99年科網股熱潮。股神奉行價值投資,但當年投資者瘋狂炒科網股,唔理股票實際價值,例如玩具反斗城當年營業額過百億美金,一年盈利賺4億銀,但市值竟唔及全年營業額只有1億兼蝕緊錢嘅eToys。
巴郡股價向來都有升冇跌,跑贏大市,但喺99年科網熱,巴郡竟然逆市跌近兩成。搞到畢菲特當年俾班財經分析員寸佢過時,連美國財經雜誌《Barron's》都落井下石,千禧年前夕擺股神上封面贈興,大字標題問:「Warren,what'swrong?」。屋漏兼逢連夜雨,唔少畢老嘅價值投資信徒都捨佢而去,轉投科網股。
旁觀者咪嘮叨
股神都係凡人,畢老都在意外界批評,佢留意到世界改變咗,但經過反覆思量,最後都冇被動搖,堅持價值投資法,唔沾手科網股。畢老呢種堅持係真傳自爸爸,佢形容老竇侯活係百分百堅持己見嘅人,唔介意人哋點諗。
畢老打個比喻,當佢畫緊畫,旁人讚賞佢會好開心,但當有人在旁諸多聲氣,問佢點解唔多用紅色代替藍色,佢就會同對方講拜拜,因為幅畫係佢,唔該咪指指點點。
(第三集)