巴西騎師震撼本港馬壇，剛周日雷神莫雷拉同蘇兆輝共贏五場，到了這晚頭場雷神墮馬受傷退下火線後，得番蘇兆輝代表巴西陣營孤軍作戰，呢位應屆英國冠軍同雷神一樣，都係贏馬機器，第二場幫東廐「加州卓越」爆完冷開齋，第四場四班1650米，新接手苗廐「珍珠旺」留前鬥後建功，個人連續第三次賽事起孖，兼且連續第五個賽日贏馬未斷纜，只差一場，此行頭馬就會到達雙位數。

「珍珠旺」同巴西騎師特別夾，前仗由雷神取得今季首捷，呢次改配蘇兆輝又有馬贏，五歲馬累積三捷全於谷草一哩取勝。

蘇兆輝今輪客串暫得九Win，其中三分一來自苗廐馬，「珍珠旺」單win及組合獨贏A3，分別派58.5及21元。今場跑第二係沿途均速慢放的「金像神話」，此駒臨場因雷神受傷而易配巫斯義，否則今場會開巴西騎師Ｑ，三、四名都係半冷門，分別為羅理雅「怡德」及何澤堯「想贏就贏」，四重彩派三萬三千幾。