當年今日

隔牆有耳:特首重建辦 - 李八方

蘋果日報 2008/06/26 00:00


四川大地震災情嚴重,港人援助同胞義不容辭,煲呔今日帶同多名高官到四川視察,並宣佈成立「特區支援四川地震災區重建督導委員會」,聯繫內地相關部門,推展支援重建工程。天災後災區滿目瘡痍,特區一場黑箱作業委任副局長、政治助理人禍,則令管治班子岌岌可危,煲呔自身難保,所以北上救災前,噚日先赤膊上陣,同埋三司十一局一齊做政治加固工程。
急救民望驚震到散
副局、政助風波令煲呔民望急挫,跌穿60分水平,坐視不理後果堪虞,事實上政界已有人竊竊私語,暗中話煲呔越嚟越似老董,先有禽流感來襲,後有高官辭職,連國寶都死於非命,都咪話唔邪,萬一又出現金融風暴,就真係好似歷史重演,不能不令人懷疑煲呔會否步老董後塵。有政界人士分析,煲呔下台機會的確好微,但相信冇人敢斷言完全絕對冇可能,當年老董忽然下台,事前又點想到佢原來腳痛吖!
煲呔噚日帶同唐唐、黃仁龍、俞宗怡、孫公及林瑞麟等高官搶救民望,因為特首民望數據每兩星期公佈一次,下次出街之日,應該係國家副主席習近平首次訪港之時,如果屆時民望繼續插水,你說怎麼辦?只怕國家領導人又要當眾訓話,指示特首、高官查找不足了。
救災救人刻不容緩,挽回民心亦然,因此八方建議煲呔即時將特首辦改組為「特首重建辦」,工作範疇獨沽一味,就係急救民望,若然唔能夠喺十日八日內將管治威信起死回生,後果不堪設想。
好多學者都話,迷信政治化妝唔係長治久安之計,所以「特首重建辦」另一任務係搞好抗震防震工作。今年係選舉年,八方相信9月選舉前政治餘震不斷,若繼續豆腐渣施政,由幾百人小圈子「選舉」產生嘅煲呔政府,恐怕抵受唔住衝擊隨時震到散。
煲呔自言飲香港水、流香港血,又話會做好呢份工,噚日佢喺立法會上揚言,做事只有一個目標,就係「對得住香港人。」相信好多香港人同八方一樣,都希望煲呔等人緊記溫總說話:「是人民在養你們,你們自己看着辦!」

mailto:[email protected]